Wierszyk dla dzieci w gwarze śląskiej - Skond sie wziyny geszynki pod chojinkom
W Betlejym łobok biydnej stajynki
przi drodze piykne trzy stromy rosły,
jedyn oliwny, drugi palmowy,
tyn trzeci to strom zielonej sosny.
A kożde chciało coś dać w geszynku
dzieciontku z Panny narodzonymu,
w ubogim żłobku na lichym sianie
bez ciepłej pierziny położonymu.
Wysoki i szumny boł strom palmowy,
łon bydzie do bajtla fajnom osłonom,
do ciyń przed słońcym w samo połednie
chwoli sie przeca ze liści koronom.
A strom oliwny niy chce być gorszy
i zdrowe oliwki mu łobiecuje,
a do familiji wiela oliwy
na łobiod, wieczerzo już tera szykuje.
Bozna se robiom te stromy ze sosny,
że yno jegły w geszynku dać może,
ale z tych jegieł nic mieć niy bydzie
we żłobku na sianie Dziyciontko Boże.
Usłyszoł to Janioł kery straż trzimoł
nad biydnom stajynkom tak łod połnocy,
łokropnie sie wkurzoł na te dwa stromy
i chcioł ich zagańbić jeszcze tyj nocy.
Zawołoł do sia wszystki gwiozdeczki,
kere tak jasno na niebie świyciły,
kejby światełkiym piyknym jak tyncza
ta biydno sosna trocha łozdobiły.
Ta najjaśniejszo kero prawie dzisiej
na wysokim niebie sie pokozała,
położoł na samej szpicy chojinki,
kejby dziycionteczku światełko dała.
Ujrzoł Jezusek ta szumno chojinka
i klacko we rynce ze wielki uciechy,
łod tego czasu wszystki bajtle majom
pod chijinkom geszynkow prawie cołki miechy.
Renia Sobik
tłumaczenie niektórych wyrazów gwarowych /gwara śląska/
geszynki - prezenty
strom - drzewo
fajne - piękne
łozdobić - ozdobić
chwolić - chwalić się
przeca - przecież
bajtel - dziecko
połednie - południe
familijo - rodzina
jegły - igły
szpica - wierzchołek
ganbić - wstydzić się
klackać - bić
brawo - uciecha, radość
miechy - worki
wkurzyć - zdenerwować